Sogno Cafe+ (已結業)

小编向来对咖啡店情有独钟，除咗食物有时有惊喜外，亦都系一个朋友嘅聊天之地。🍝咸蛋黄鸭胸肉长通粉第一啖食落去的确有惊喜，咸蛋黄嘅香味提升咗意粉嘅层次，配料亦都非常多，份量好大。不过食咗一小半后，咸蛋黄嘅口感加上冇太多酱汁嘅意粉，有啲食腻。🍳是日牛肋条蛋包饭份量一如已往地大，热乎乎嘅蛋中和咗牛肉嘅咸味，同白饭一齐食，就多重滋味。侧边放上咗小小沙律，食起嚟添上几分清新，好快食完喇。🍗玫瑰鸡翼小编不嬲都唔太钟意花嘅味道，不过被强烈推荐嘅玫瑰鸡翼就打破咗我对佢嘅固有形象。玫瑰香味同蜜糖甜味，为鸡翼添上独特风味。除咗单叫有少少贵之外，都系值得试下嘅。饮品方面不过不失。🍫朱古力半溶麻糬Brownie呢间Cafe最出色嘅就系甜品，我哋就以最高期望迎接啦~由于前面已经食到好饱，所以都系有啲怕食唔落。食咗第一啖，小编就知道女人。。。的确系有两个胃咖。烤棉花糖嘅外脆内软，配上Brownie，加上上面嘅杏仁片，超！级！好！食！小编绝对可以一个人食晒成个甜品。当然如果棉花糖再加多啲，就更满足、更幸福。总结嚟讲，食物不过不失,得闲去食个甜品都系唔错嘅。环境都好好，好安静，室内装饰亦都好可爱，就系地方有少少难揾。