隠家拉麵工場 (已結業)

隐家拉面位置都几隐世，系苹果广场最入面。店舖细细，外面有部自动售卖机。1点几黎到仲有每日限定发售10碗嘅拉面，但不竟第一次黎就试下最基本又最多推荐嘅隐世白伝。食沾面次数五只手指头数得晒，所以食之前都重温下点样食先。搅一搅，淹一淹，索一索。第一口嘅感觉系咸。沾面用嘅拉面粗身，挂面效果十足，亦因为咁所以比较油腻，已经分唔到系麻油定葱油。原来大boss系紫菜，吸收晒全部咸味。食食下发觉个面带有魔性。面质本身弹牙好味，我发觉只要淹完沾面汁，再放返系原本碗面到high走一d汁，就会好味d，冇咁咸。另一个好味要决系落醋，大大减轻油腻感。友人叫咗黑伝，黑蒜感觉好味d。配料除左紫菜仲有一只糖心蛋、两片有大大片豚肉。糖心蛋吸晒沾面汁，变咗糖心卤水蛋，连蛋黄汁都啡啡地。豚肉半肥瘦，唔知系唔系个汁本身都油，盖咗豚肉嘅油腻感。豚肉味道唔错。根据指示，沾面食到最后可以加汤饮。但为咗我嘅血压、肝功能著想，都系唔饮。睇黎沾面唔系好岩我。食日本面都系食返汤拉面。后记：我同友人都试落芝士粉食，出奇好味。有d来回地狱又折返嘅感觉，又回到充满咸味嘅沾面。