鼎豐雞煲泰國菜 (已結業)

我哋今次试麻辣鸡煲半只中辣，店员问我哋顶唔顶得顺，惊我哋食唔到咁辣，好细心。但系我哋对于食辣呢方面都比较有信心，所以坚持中辣～嚟到嘅时候已经好香，店员帮手捞匀就食得。我明白点解店员会担心我哋食唔到，其实又真系几辣嘅，好彩平时训练有素！自问唔系好食得辣嘅可以试吓BB辣同小辣。啲鸡好滑，店员叫我哋开始食嘅时候，依家系啱啱好熟嘅状态，所以店员会帮我哋熄火，话惊啲鸡会标油令到啲肉老咗就唔好食，真系超级细心！我哋叫左少少配菜：莴笋、鸭血、鸡子、娃娃菜，另外仲嗌左一个佢哋舖头自家制嘅麻辣饺。要特别赞嘅系佢哋嘅麻辣饺，有成只虾系入面，麻辣嘅香味渗透成只饺，真心好食！呢间舖头除咗鸡煲仲有主打泰国菜，于是我哋都试吓佢嘅牛油鸡翼，摆到上枱已经成阵蒜蓉牛油香飘晒出嚟～啲鸡翼热辣辣咁，鸡翼非常之嫩滑，呢味𩠌比较浓味，好想嗌个饭送饭食！因为佢系鸡𠮶加泰国菜，佢有新鲜椰青冬荫功汤底嘅鸡煲，好新颖～下次一定要试吓！