泰潮 (嘉咸街) (已結業)

今日喺中环收工，突然之间好想食泰国嘢，于是就上OpenRice揾吓有咩好嘢食，见到呢一间泰国餐厅价钱唔贵，有好多人推介，就入嚟试一试。同好多泰国餐厅一样，呢度嘅员工都系泰国人，而且店入面嘅装修系贴满晒曼谷唐人街嘅照片，舖头入面嘅配色都同唐人街入面一间好出名嘅海鲜饭店一样，系呢一段去唔到旅行嘅时间，都算系帮我止止痕。我哋每人点左一份一人套餐，主菜未上之前首先放低左两碗汤，系非常有泰式风味嘅胡椒鸡汤，同喺曼谷水门鸡饭饮到既好相似。男朋友叫咗一个海南鸡饭，听讲呢一度嘅海南鸡饭系有米芝莲推介。男朋友都嘴刁，但系佢都食得出呢一个海南鸡饭系高质嘅。肉质淋亦食得出系新鲜，姜黄饭落得够多姜黄。值得一提嘅系佢个辣汁，味道非常正宗，酸辣亦都适中。而我就叫咗一个猪手饭，呢一样野好少喺香港食到。呢一间嘅猪手饭亦都10分肥，不过对我来讲系好事，将佢比较多油脂嘅部位佢点佢比嘅𠮶个辣汁，非常好食，非常有泰式风味。伴碟嘅酸菜同蛋都同泰国嘅规格一样值得一赞。每个一人餐都会附送一个小食，男朋友拣咗炸鸡翼，正正常常。而我就拣咗个酸辣凤爪沙律，份量都几多，亦都好味。餐饮系泰式奶茶同埋泰式柠檬茶，饮得出佢嘅茶底系泰国嘅手镖茶。