好旺角粥麵專家

营业中

休息中

肥仔奇食尽全香港知名云吞面店，门口有明星相嘅、饮食杂志大肆吹捧嘅都食过哂，一唔系份量太少，就系名不副实，云吞面嚟讲，肥仔奇来来去去都系钟情呢一间。坐低无耐，隔篱台嚟咗几位洋人，佢哋四处打量又互相商量咗成十分钟之后，四个人每人叫咗一碗鲜虾云吞面。竹升面依旧爽口弹牙，云吞入面嘅虾有虾味，仲食得出有肥猪肉，呷一口由大地鱼等等熬制而成再搭几粒韭黄嘅汤底，实在系人生一大享受。无怪乎洋人都识得嚟揾食。嗱嚟呢度食猪手，绝对记住要食捞面而唔系汤面，点解？除咗话捞面嘅面底多啲饱肚啲之外，更重要嘅系猪手嘅南乳汁捞埋啲面嚟食至系一绝，若果叫汤面的话，汤底将猪手嘅南乳汁沟淡咗，猪手固然之就会冇咁好味，仲会搞到个汤底浊哂。猪手一贯地干净冇毛、油香软熟兼入味，冇得输。肥仔奇唔食猪润，但系会食猪润熬出嚟嘅粥底。粥底绵，皮蛋软，成个粥底都有鲜甜味，正斗！