秋香 (黃金海岸商場) (已結業)

夏天嚟到,今日特登入咗屯门黄金海岸游水,去黄金海岸真系好方便,无论搭车揸车一阵就到,游完水谂住喺附近揾啲嘢食,附近有好多西餐厅都好吸引,无论环境同气氛都好好。秋香 黄金海岸商场,今日都试咗呢间秋香多国菜,居酒屋,串烧。 去到餐厅气氛非常浪漫,装修得好有格调,喺度食晚饭感觉真系好舒适。坐低点咗个二人套餐 853元,日式渍物,配大蚬味噌汤作为前菜,腌萝卜同蒜头都系我嘅至爱,酸酸甜甜特别开胃醒神。二人前秋香推介,威士忌烧蚝,矶烧鲍鱼,烧蚝真系好香口惹味,食落去蚝味香浓,味道鲜甜,有少少酒香令生蚝嘅鲜味更加突出,配上三文鱼籽,葱花增添口感同味道层次。 矶烧鲍鱼卖相更吸引,鲍鱼烧到啱啱好,味道唔会太咸反而有阵阵嘅清香鲜味,肉质鲜嫩弹牙口感一流。二人前炸物,烧物。炸物有炸生蚝,炸大虾,炸大虾外脆内热,入面嘅虾肉爽口弹牙味道鲜甜。烧物拼盘真系不得了,材料非常丰富有烧鸡肉,烧牛,烧鸡翼,烧秋葵,烧菠萝,烧大啡菇。最好食就系个烧鸡翼,鸡皮烧到脆卜卜,鸡肉仲系好嫩滑好juicy,加少少香料调味,食落去特别香口惹味。精选甜品,甜品就送咗个芝士蛋糕配士多啤梨,芝士味好香浓,士多啤梨多一份清新嘅后感觉。