尚品餐室 (已結業)

最近食多咗住家饭所以少咗好多外出吃饭，通常冇人煮饭嘅话我都系出去食饭！原来系深水埗西九龙中心对面对正就有一间食中式菜嘅餐室，叫做尚品餐室。里面啲格局都好似普通茶记，不过都有啲似我之前同屋企人去食嘅私房菜。好似酒楼咁一样有比人洗餐具嘅服务，我太早来食饭所以真系冇咩人，始终香港人都系夜鬼，六点左右边有人黎食晚餐架？一睇呢个餐牌就想叫海南鸡，同时都配有老火汤，蚝油时疏同埋鸡油嘅饭。另外加多杯冻柠茶就要加＄8，原来呢间餐厅夜晚系冇热饮嘅，不过正常人系呢个夏天嘅晚上都会想饮冻饮啦！成枱嘢食＄76抵唔抵就见仁见智，至少一个大男人食完都觉得非常饱⋯不过海南鸡就唔系非常似海南鸡，味道比较似白切鸡，不过口感一样滑嫩，少咗海南鸡嘅风味，可以点上葱油汁更添风味，另外都有一个烧味豉油真系睇吓个人口味啦！另外果一碟油菜就系菜心，整得比较爽，时间刚刚好，加埋蚝油就丰富返小小。个老火靓汤到真心唔错，里面有有红萝卜同埋青萝卜，猪骨同埋猪肉都占好大比例，好足料，虽然唔知道有冇味精，但系饮落去好清甜好香！鸡油饭都系不得了，虽然有少少干身，不过鸡油嘅香味真系好夹食海南鸡，好好味，不过好快就会食饱，我咁大食都竟然有d食唔晒添