海南少爺 (已結業)

海港城汇集咗各国餐厅美食，今日见终于唔洗等位，就决定试吓呢间星马餐厅！餐厅装修为典雅蓝调，配以落地玻璃嘅海景，喺夜晚更加迷人。不过海景位今晚已经满咗，拣左近门口嘅枱，位置相当阔落舒适。我见combo几吸引，一次过有齐两样我钟意食嘅嘢，毫不犹豫就简咗个招牌海南鸡油饭并马来西亚肉骨茶，朋友就话要试个星州卤水拼盘同咸蛋黄鱿鱼。餐厅提供荔枝味嘅热茶，感觉几新鲜；睇完餐牌见饮品好吸引，又叫多咗杯热带雨林同柑香蜜雨。餐厅上菜速度都几快，转个头已经有得食！招牌海南鸡饭并马来西亚肉骨茶一上枱，已经闻到肉骨茶嘅香味。呢个系药材底嘅肉骨茶，足料，味道浓郁得嚟又唔会太咸。海南鸡嫩而唔肥腻。咸蛋黄鱿鱼有咬口又唔会靭。卤水拼盘份量都几多，分别有猪手、花生鸡脚、流心蛋同豆腐。整体唔会太咸，仍然保留各食物原有味道。当中，流心蛋个蛋黄真系令人回味；而朋友就特别喜欢卤水花生带点本身花生嘅甜味，食到停唔到口。两杯「雨系」饮品颜色鲜艳；热带雨林带有阵阵菠萝同石榴香味；柑香蜜雨就带点酸味，非常开胃。窗口位唔系太多，如果要睇夜景就记得提早订位喇！