影片
更多
2023-04-10
4834 浏览
通番关，好多人外游，报复式消费，小弟一向自觉甚为理性，就算消费都唔会报复式，至多都只喺使多少少而已。亦唔会晌啲大节日外游，成本贵嘛，宁愿留港消费，支持吓本地商户，趁复活节就食得豪少少，一于自助餐啦，够尽兴嘛！所以，是夜到访「港丽酒店」嘅「咖啡园」，一次过品尝多国滋味。贵为五星级酒店，环境当然好好啦，虽然餐厅晌地库层，但跟大堂天花连成一体，所以，空间感超强大，装修简约得嚟好雅致，感觉非常舒服。而且，啲枱亦特别大张，摆满成枱嘢都唔觉逼，招呼又熨贴，食物补充又足，可能今晚客唔算多，所以，唔会似有啲自助餐又要排长龙，又要抢咁款，晌度真喺食得自在。此外，餐厅有另一边通道出去户外区，其实出面喺酒店泳池加露天酒吧区，环境非常有气氛，坐晌度令人觉得好悠闲写意。当然，客人都可以拣坐出嚟，但天气开始有啲闷热，坐番入去爽啲。今次自助餐以「海陆美馔寻味之旅」为主题， 顾名思义，「海」就梗系指各种环球海鲜啦，「陆」就以多种即烤烧肉为主打，一阵先再慢慢介绍户外区嘅烤肉。星期一至四晚计，成人收$798，星期五至日及公众假期成人收$838，另收10%服务费。听经理讲，官网最近推出「Hungry Tuesday」快闪优
贵为五星级酒店，环境当然好好啦，虽然餐厅晌地库层，但跟大堂天花连成一体，所以，空间感超强大，装修简约得嚟好雅致，感觉非常舒服。而且，啲枱亦特别大张，摆满成枱嘢都唔觉逼，招呼又熨贴，食物补充又足，可能今晚客唔算多，所以，唔会似有啲自助餐又要排长龙，又要抢咁款，晌度真喺食得自在。
此外，餐厅有另一边通道出去户外区，其实出面喺酒店泳池加露天酒吧区，环境非常有气氛，坐晌度令人觉得好悠闲写意。当然，客人都可以拣坐出嚟，但天气开始有啲闷热，坐番入去爽啲。
今次自助餐以「海陆美馔寻味之旅」为主题， 顾名思义，「海」就梗系指各种环球海鲜啦，「陆」就以多种即烤烧肉为主打，一阵先再慢慢介绍户外区嘅烤肉。星期一至四晚计，成人收$798，星期五至日及公众假期成人收$838，另收10%服务费。听经理讲，官网最近推出「Hungry Tuesday」快闪优惠，逢星期二12:00pm上线，其中嘅自助餐优惠可以最高去到7折。
所有食物都集中喺入门口右手边嘅区域，之前提过嘅即烤烧肉，就由另一条通道出去、近泳池嘅户外区。
饮品区冰镇住橙汁、苹果汁、西柚汁，仲有汽水及啤酒都喺无限畅饮，饮得尽兴；而另外加$120更可以无限添饮指定红白餐酒及气泡酒添。 此外，餐后仲包一杯啡茶、柠茶、柠水，到临尾食甜品时，衬番杯咖啡就最好喇。
沙律吧有多款新鲜沙律菜，有别平常啲一大盘，啲沙律菜排列得好整齐，配以法式、千岛、意大利沙律汁、油醋；晌冷盘𠮶边仲放有数款沙律配料，整体嚟讲唔算多，但都叫够精。
此外，仲有7款预制好沙律，款式包括鸡肉菠萝沙律、泰式茄子配小鱿鱼沙律、烧吞拿鱼沙律、柚子大虾沙律、日式豆腐、泰式海鲜沙律、藜麦沙律，睇起嚟都几吸引。
冷盘再顺便讲讲几款冷盘，不过，3款都喺三文鱼，但做法各有不同，分别喺烟三文鱼、刁草三文鱼、焗三文鱼，口感同味道都各有特色。
将几款新鲜沙律菜，加啲酸青瓜、蕃茄干、紫洋葱……等等配料，再淋上法式及意大利沙律汁，配上少少三文鱼及杂锦生果，造就小弟呢碟色彩缤纷、开胃嘅头盘，样样都有啲，够晒多元化，越食越开胃。
而另一碟就喺将所有预制好沙律放埋一齐，又变咗一道特色头盘，食得出用料够精，配搭非常好。无论吞拿鱼、小鱿鱼、大虾，都好好味，菠萝够鲜甜，柚子够清爽，藜麦更加够晒健康。
刺身、寿司、卷物 虽然刺身、寿司、卷物无食到，但都稍稍介绍一吓，尤其啲刺身，除咗三文鱼、吞拿鱼、油甘鱼，更提供拖啰，朋友食咗就大赞啲拖罗正到不得了，甘香油润；另一边仲有8款寿司、4款寿司卷，仲有少少味咐八爪鱼仔，应该满足到大部分人嘅喜好。
加拿大生蚝每位客人会另外送上即开生蚝（两只），蚝肉质感嫩滑，入口好有蚝鲜味，淡淡嘅海水味，极富海洋气息，却唔会太咸，唧少少柠檬汁，唔单止更突出蚝鲜味，食落更加清爽。
加拿大生蚝
29 浏览
0 赞好
0 留言
花雕醉鲍鱼除咗生蚝，仲会另外每位客人送上一客鲍鱼，虽然无讲几多头，但睇相都见好大只，事后侍应讲，每周都会有唔同款式，例如鱼子酱、煎鹅肝。至于呢件鲍鱼，口感柔韧有咬口，食落确喺有少少酒香，真系几好食。
花雕醉鲍鱼
40 浏览
0 赞好
0 留言
海鲜吧食自助餐最回本嘅一定喺啲冰镇海鲜，餐厅供应5款海鲜，包括：加拿大鳕场蟹脚、大蚬、新鲜波士顿龙虾、大海虾、澳洲青口，佐以几款酱汁，如鸡尾汁、柠檬牛油酱、红酒醋，都几特别。就目测所见，呢啲回本嘢好抢手，但成晚都见补货甚快，完全无间断供应。
啲冰镇海鲜真喺好有质素，蟹脚好鲜甜，极有蟹味，大蚬、青口肉质嫩，唔会韧到似擦子胶咁。当然啲龙虾喺最正，大大嚿虾肉一啖放入口，真喺无得弹，厨师更话佢哋啲龙虾喺活生生嘅新鲜货，唔系冰鲜嘢，所以，啲虾肉极之爽口弹牙，虾味强。
海鲜
48 浏览
0 赞好
0 留言
面包篮、热汤一口气食咗好多生冷嘢，所以，饮番个汤嚟暖暖胃，再配个面包。自助餐嘅面包一向都唔会点有牌仔介绍，睇样就喺啲小型欧陆包仔。而餐汤方面，一款喺中式老火排骨汤，另一款喺柠檬鸡薏米汤，钟意佢哋用啲保温煲座住啲汤，嘅时间啲汤够热焫。
小弟就拣咗后者，个汤有少少柠檬清香，里面有啲鸡肉粒，又有啲薏米，感觉几特别，都喺比较少饮到嘅款式。面包软熟得嚟有咬口，里面有啲红梅干，搽啲牛油已经好好食。
烧味烧味喺酒店嘅中餐厅出品，所以，质素有返咁上下，有烧鸭、叉烧同海南鸡，仲配咗好多酱汁，例如黑豉油、海南鸡饭辣酱……等我。
小弟就无食烧味，呢个部分就由老友嚟评论啦。佢试咗海南鸡同叉烧，佢话啲叉烧做得出色，入口好松化，有少少玫瑰露香气，最正喺有㶶边位嘛，海南鸡都觉得唔错，但又未算话好食到飞起。
热盘、即切烤肉热盘类分咗两个区域，相信喺刻意安排，因为一边喺中式，另一边喺西式，前者有煎鲈鱼、蘑菇扒时蔬、炒大虾、咕噜肉、海鲜炒饭同韭黄炒面；后者就有煎鲈鱼、煎鸡薄片、烩牛肉、法式杂菜、炒西兰花、蕃茄汁海鲜长通粉同黑松露薯蓉，全部均有电磁炉热住，令到啲食物时刻保持一定热度。
即切烤肉方面，就提供咗威灵顿牛柳同盐焗原条盲𫚧，呢两款菜式晌自助餐都算比较少有。仲提供咗黑椒汁、烧汁、辣根奶油、蜜糖芥末酱……等等。
老实讲，咁多热盘嘢，试就试唔晒架啦，亦好难话点食到回本，加上一阵仲要食埋户外区嘅即烤烧肉，所以，热盘嘢就喺咁二拣几款。威灵顿牛柳、煎鲈鱼、炒大虾、烩牛肉呢几款真喺好食，尤其个牛柳，里面包咗鹅肝酱，味道层次丰厚，但喺盐焗盲曹个人就觉得有啲咸。
即煮粉面 晌自助餐嘅即煮粉面、即煮意大利面……等等，都一律少试，因为太易饱肚，但都要介绍一下，阵容就唔算好多。面底有上海面同米线供选择，𩠌料就大概约有十款，而汤底有清鸡汤、担担面汤同酸辣汤。
见𩠌料唔太吸引，小弟就无试，留返俾老友嚟评一评。佢就试咗豆卜、素鲍鱼、韭菜配上海面搭清鸡汤，佢话整体不过不失，可能要试担担面汤或酸辣汤先见到真章。
即烤烧肉 出到去户外区，见到个巨型烧烤炉，以及插住两大嚿脆皮猪腩，加埋侧边放有好多配菜、酱汁，非常有阵势。其实除咗猪腩，仲有斧头猪扒、香烧和牛、澳洲羊架、鸡槌，以及多种烤野菜。师傅不断烤肉，发出火光熊熊，烟熏香气四溢，唔吸引人都几难。
呢部分点都留咗肚嚟试试，师傅好有心，样样都切啲俾我，再配上多款烧野菜，仲要摆到靓靓仔仔一碟咁，睇见都开心。呢份即烧杂扒，食落和牛真喺一流，软腍富由香，而羊架亦喺小弟最心水，同样膻香好食，猪腩亦都正，沾芥辣一流。
即烤烧肉
53 浏览
0 赞好
0 留言
去到甜品环节，先介绍每晚8:30pm会有即煮甜品表演，是晚就喺士多啤梨罗曼诺夫，即喺乜？就喺橙酒烩士多啤梨，睇住女师傅煮溶砂糖之后，放入大量士多啤梨果肉，煮腍后再加上橙酒，发出微微火光，成品会再唧上鲜忌廉。
个人觉得有少少似生果杯，不过士多啤梨甜甜哋，又有少少酒香，撞一撞啲忌廉，味道酸酸甜甜好唔错。
士多啤梨乳酪慕丝此外，临尾侍应仲会额外每人送上一款特色甜品 ，是夜就喺呢款乳酪慕斯，加上少少杂莓，洒点 开心果仁碎，卖相非常之靓。呢个甜品超好食，原来里面喺打碎咗嘅士多啤梨果肉，外层包住软滑而微微酸香嘅乳酪慕斯，正呀！
士多啤梨乳酪慕丝
20 浏览
0 赞好
0 留言
甜品区试咗以上两款甜品都未够喉，无问题，甜品区仲有4 款甜品，虽然唔多，但都喺高质素出品，包括黑森林蛋糕、法式焦糖炖蛋、意大利芝士饼、抹茶挞，以及可以随时向侍应攞嘅Häagen-Dazs雪糕。由于款式唔多，所以一次过试晒4款，果然喺酒店级出品，绝对唔会叫人失望。
上文都讲过，会包一杯餐饮，嚟到甜品时段，咁就梗喺要配杯即磨咖啡啦，食甜品，几时都喺配杯咖啡最合衬。
今餐自助餐又再食得满载而归，虽然自助餐去到9:30pm，但同朋友都倾到10:00pm先走。侍应都好好招呼，一来临尾都提一提我哋需唔需要再攞多少少食物，二来亦都无催我哋走，而且成晚收碟、补充食物都做得好足，佢哋亦好好礼貌，让客人都食得称心。更话呢度有生日礼遇，凡问生日月份内预订自助晚餐，餐厅都会奉送迷你生日糕点乙件。
张贴
