檳榔島敍

营业中

休息中

朋友喺鲗鱼涌返工，带咗我去太古坊附近嘅槟榔岛敍食饭。餐厅嘅装修好有风味，座位舒服，餐牌嘅嘢食都好吸引。我哋两个人嗌咗两个主菜，一个小食拼盘同两杯嘢饮。椰浆饭配马来生炸鸡髀卖相吸引，炸鸡髀好大只，上面撒满香草，外脆内热，鸡肉好多汁，唔会好鞋。椰浆饭好香，同个炸鸡髀好夹。另外仲有炸鱼仔同埋花生做配菜，点埋佢嘅酱，真系好好味。另外要咗个咖喱叻沙海鲜米粉，都几足料，有鱿鱼圈、青口、虾、蚬、豆卜、糖心蛋同埋芽菜。汤底食落少辣，好香口，又开胃。啲海鲜都好食，啲虾好弹牙，米粉份量够多，唔会煮到一pat嘢，真心推荐。招牌小食拼盘足够两个人share有余，啱晒一大班人食。炸鱿鱼圈外面够脆，鱿鱼有咸香，好好食。虾多士细细粒，可以一口一粒，好松脆。鸡锤好香，辣辣地好过瘾。粗薯条炸到脆卜卜，撒上七味粉，热辣辣好好味。朋友嗌咗热柠檬薏米水，我见到入面都几足料，有好多薏米，感觉应该好健康。我就要咗冻龙眼冰，上面有好多龙眼肉，饮落好清甜解渴，同我哋嗌嘅嘢食好夹。见到有人嗌薄饼，睇落都好好味。另外佢仲有好多甜品，下次多啲人食就可以试吓。