八幡屋日本料理 (已結業)

又黎到放题集中地—兆万，宜家放题走高质路线，食材同菜式都越黎越好。今日就嚟左八幡屋试下，地方企理，食物款式又几岩我地心水。首先睇睇餐厅环境先，位置都几寛敞，坐得几舒服。灯光较暗，配合埋张吧枱，有点点日式居酒屋感觉，情调方面做足功夫。同以往一样，都系先食刺身。色泽几亮丽，睇落颇新鲜，肉质爽甜，有油脂。虎虾肉厚，又有光泽，喜出望外。加左二款炙热三文鱼寿司及海虾寿司。虽然份量唔大，但系啱晒放题可以试多几味。三文鱼略为烧过后，油脂香迫左出黎，配上芝麻酱又唔会觉得油。而虾上面嘅芝士亦唔会盖过左虾本身嘅鲜味。是日尊贵加推，芝士大龙虾，几乎有手掌咁厚架。厚厚嘅芝士，仲有厚实嘅龙虾肉，系视觉同味觉上都带来冲击。一流，记住趁热食！ (仲放到好似个心心咁添<3)健康人当然要食菜啦，叫左呢碟牛油炒野菜。牛油香十足，亦唔会好老，大件夹抵食。继续芝士系列，今次到芝士蚝，大大只无异味，沙律酱酸甜惹味，仲有焗完都唔会dry，唔错！甜品方面系自助式。有笑哈哈之选，芋头味同云尼拿味嘅雪糕糯米糍，加上比较特别嘅冰菠萝，有返小学嘅童年回忆，而且真系雪到硬一硬，有食冰既感觉，记住试啊！