圃公館 (已結業)

今日同埋朋友食饭，见咁耐无见就拣间 fancy 啲嘅中菜厅试下喇。听啲朋友话去过圃公馆嘅点心放题，所以我就提议试下晩餐喇。秘汁牛展 ($78)真系想讲我第一次食到咁高质嘅牛展！平时啲牛展多数都偏硬身，几有咬口。但呢度嘅牛展竟然可以煮到咁腍咁入味，仲有小小入口即溶感觉！酱汁都好惹味，嗌碗白饭直头可以就咁当个𩠌食呀。海鲜酸辣汤 ($98/位)佢个碗下面有个炉帮佢keep住热，完全唔怕同啲fd一路吹水会搞到冻哂。一嚟到有阵好香嘅麻油味，汤嘅酸辣度都系啱啱好，喝得过瘾。汤都好足料㖞，有好多虾肉呀，木耳等材料。价钱系贵咗啲但绝对真材实料。桂鱼酸菜 ($380)啲鱼肉真系超滑溜，而且佢配合酸酸地嘅汤令到条鱼一啲都唔单调，不过佢有小小骨所以食落要格外小心！酸菜都有好多，但讲到最惊喜一定系底下嘅面条，好似宽条面同薯粉咁，厚身得嚟又烟韧，捞埋个酸菜汤一齐食好开胃。水煮黑豚肉 ($208) 睇落好似好辣，但唔好俾卖相呃到呀。有麻而不辣感，唔会话辣到条脷好唔舒服。豚肉好嫩滑，而且肥瘦均匀。呢餐饭我哋四个都好满意呀！