隨心 (已搬遷) 新店位置

今日做完gym就黎左附近呢條鰂魚涌呢條食街海光街食返個post workout meal。營養師話做完運動應該補充蛋白質同適量碳水化合物。食呢間海南雞飯就啱曬。但係又見呢度店名有華人喇沙咁大隻字，又心郁想試。決定叫呢度招牌菜，海鮮喇沙（$80），加個海蜇雞絲沙律($38)等我可以食多啲雞，又不至於浪費啲飯。海蜇雞絲沙律黎到係超大份，呢個價錢真係抵食，用既雞脂肪唔多，啱曬健身人士，食完呢個我既蛋白質夠曬數！雞中間加埋海蜇，令口感軟中帶爽，正啊！海鮮喇沙果然係招牌菜，首先湯底椰香味夠重，帶微辣，對平時唔食辣既人黎講，絕對係接受到既程度。湯底濃郁，所以啲麵都好掛湯，啖啖味道都好豐富。配料有兩件超索湯既豆腐，一咬就必曬啲喇沙湯出黎！蝦有兩隻，味道幾鮮彈，肉質唔會好霉。魚片亦夠彈牙。仲有半隻蛋添。喇沙傳統就係用米粉加米線，口感咬落有爽有嫩好特別架。時間尚早，比我趕上午餐尾班車，加$2已經有杯飲品，冷熱同價。我叫左熱檸檬薏米水，味道有蜜糖甜味，加上檸檬既酸味，係幾開胃解膩既飲品。呢度上菜幾快啊。侍應亦好友善，背景音樂播住廣東歌純音樂，好令人放鬆。絕對唔係一般茶記。