Genie Juicery (已結業)

周六食完餐趣怪丰富o既「鬼怪万圣英式下午茶」后，XO仔同契妹决意做运动减吓肥，结伴由上环行去湾仔。由于要帮家人买咖啡，中途就专登兜咗去IFC，契妹就乘机一访位于商场二楼o既名牌果汁店「Genie Juicery」。门外餐牌及单张所示，以特制果汁代餐有助洗涤肠胃，多款疗程o既日数、汁料、功效及价格都有所不同。眼见雪柜内樽樽饮品都咁绿，小肥原本真系冇谂住饮架，不过既然契妹话请客，友善o既收银哥哥仔又咁落力讲解佢家所制o既果汁全为冷压榨出，以减低流失o既营养成分，细佬最终就应推介，拣咗樽有助排毒消脂而又唔系绿色o既「The Master」。红色o既「The Master」主材为柠檬、青柠、巴西莓、奇亚籽，并含有机辣椒，所以饮落清凉醒胃得黎带有微微辣劲，不过一啲都唔话过酸，意外地好易入口，仲几讨好添。喜爱健康食品o既契妹除咗要咗樽绿色「夏威夷水」之外，俾钱时仲加买咗四件天然有机椰子糕点。独爱朱古力o既XO仔只系试咗件可可味浓郁o既「Organic Raw Chocolate Macaroon」（$22/件），食落好原味，好健康。