兩姊妹涼皮有限公司 (柏樹街) (已搬遷) 新店位置

由三年前食两姊妹食到而家，基本上成个meau都食匀，一直都觉得味道不错，质素稳定，价钱相宜，作为饭前小食甚至女士想食少少当一餐绝对不错。但近日见到某啲人无的放矢，乞衣到数有几多条青瓜丝，拎city super嘅沙律呢啲唔相关嘅嘢去比，仲恶意抹黑话要特登写多几个食评刻意写衰两姊妹。你有你反对我有我中意，今日一于写下我最中意食嘅重庆凉面。两姊妹嘅凉皮基本上好快就卖哂，所以好多时去到就得返凉面。本身净系食开凉皮嘅我决定一试，顿时觉得多左个选择。凉皮 VS 凉面凉皮就滑捋捋啲，索哂辣汁好惹味，但食完可能就唔系咁饱肚，硬系觉得意尤未尽，饮多几啖汤都系未够喉。凉面就相对硬身，未必咁挂汁，但相对饱肚啲。再加上凉面系同青瓜丝同芫荽一齐上，一淋一爽嘅口感真系愈食愈开胃。食完之后仲有碗底嘅漏网之鱼豆豆可以连香辣汤汁捞埋上嚟食，脆口非常，29蚊嘅价钱完满地解决一餐。