616牛肉火鍋專門店 (積富街)

营业中

休息中

觉得牛呢种食材好神奇，明明都系牛，唔同部位都有唔同味道。适逢天气转凉，想食牛又想打边炉，所以去咗试试616嘅打边炉。以火锅店黎讲装修非常靓同有香港特色，有好多唔同嘅装饰。好得意嘅垫枱纸，推介牛部位，同埋教客人唔同嘅牛部位要渌几耐先好食。饮品叫咗三款，最钟意玫瑰洛神花茶，完全唔酸，加咗蜜糖好味道。觉得呢款橙味汽水比大牌子嘅好饮。饮咗半支嘅菊花桂圆露，几清新几甜。主角汤底系鸳鸯沙牛，一边清淡一边浓郁。左边清汤入面有芹菜芫茜同萝卜牛展，配牛肉食唔会喧宾夺主；沙嗲汤底配响铃、公仔面，索完汤一齐食无得弹。每碟望落去都非常靓。右二嘅系苏格兰雪花胸肋，系我全餐最钟意嘅牛，油脂分布平均，牛香十足。包住猪肉涵嘅蛋饺，非常特别。牛驼峰一样牛香十足。牛横隔膜我比较少食，相对其他部分冇咁油，肉质口感好好。难得见到有卖牛骨髓嘅铺头，当然都要试吓。唔腥呢点相当抵赞，配沙嗲汤好好食。加点一份双层肉，可能近牛肚腩，好多油脂，相对前几款牛肉系食肉香，佢就倾向食油脂嘅香味。整体而言非常满意，食物非常美味，感觉到绝对唔系交行货。环境又干净，地板冇预期中嘅痴笠笠。虽然价钱贵少少，但真系值得。