古早牛肉麵 (已結業)

上年同熊先生去完台湾之后, 一直对台式牛肉面念念不忘, 今日就嚟试下呢间喺深水埗站附近嘅 - 古早牛肉面。虽然牛肉面系呢度嘅招牌菜, 不过餐牌上仲有好多选择, 唔会独沽一味。呢个面就有齐我想食嘅牛肉同牛筋。台式牛肉面一般都会用上牛腩或牛展, 今次呢个就选用咗厚切牛展, 肉质腍得嚟有嚼劲。牛筋煮到半透明, 仲非常入味, 质感柔嫩腍滑, 胶质丰富。汤头味浓而不油腻, 带微微药材香味。扁身面条富有弹性, 吸收晒汤底精华。细细件嘅一口馅饼, 一咬落去, 汤汁就爆晒出嚟小心烫口呀！馅饼外层煎至干身微焦, 无畀汤汁浸腍, 咬落半硬半软, 口感唔错。馅料唔算多, 但胜在葱香皮脆, 如果多啲肉就当然更美味啦。饮品可按个人喜好选择甜度 & 冰度, 仲有唔同size俾你拣。