美味的泰國菜餐廳 (已搬遷) 新店位置

平日行开呢间美味的泰国菜餐厅都见到好多人食，虽然店舖细细间，得几张台仔，但成日都坐满人，莫非真系咁美味，一于试过先知。 呢间餐厅系正宗泰国人主理，连啲职员都系泰国人，墙上都贴咗泰皇嘅照片，好似去咗泰国咁。 泰式大虾炒金边粉用个蛋网包住啲金边粉，卖相相当吸引，大虾爽口，味道甜中带酸，再加少少青柠汁，加埋啲香脆花生，充满住泰式风味。 炸虾饼够热烫口，咬落去仲有烟出，虾饼炸得金黄香脆，爽口弹牙。 烧猪颈肉真系必点㗎， 肉质好爽脆，亦有焦香，再配埋个泰式酸辣汁无得输。 泰式沙嗲串烧系每次食泰国菜必点嘅菜式，猪牛鸡各点咗一串，表面微焦，加埋啲沙嗲酱，真系非常滋味。 黄咖喱啱晒我呢啲唔食得辣，但又想品尝下咖喱滋味嘅人去点，今次拣咗鸡，有浓浓嘅咖哩香同椰香，配菜薯菜够粉够入味，净系捞啲汁都可以食多两碗饭啦。