一寿司 (已結業)

一寿司搬咗真系唔知, 太耐无去, 系朋友话要去食寿司先知。天气咁热, 见到餐牌, 点d清新之选食吓, 就点咗香芒甜虾寿司及梅酱贝片。香芒甜虾卖相讨好, 睇落都清新, 食落去芒果加甜虾加青瓜再加沙律酱, 真系似芒果沙律加饭, 芒果够甜, 意料之外, 因为好多用芒果做嘅菜色都系酸酸地, 唔系咁钟意, 所以就觉得呢个寿司特别好食。试下个梅酱配贝片会唔会开胃d, 块贝片好爽口, 够新鲜, 加梅酱酸咪咪, 都算开胃, 夏日不错之选。两款蟹嘅寿司, 分别系蟹膏甜虾及蟹膏蟹肉寿司, 蟹膏配甜虾同配蟹肉有唔同食法, 虽然蟹膏嘅颜色望落去就麻麻地, 但食落又好香蟹膏味, 我就觉得配蟹肉好似夹d, 蟹肉好鲜味, 成为我至爱之选之一。唔系咁多人会食左口鱼边寿司, 我地都无咩食过, 但今次就试下, 发觉左口鱼边好爽口, 肉质有口感, 虽然唔系肥美的感觉, 清淡d, 无咁溜。帆立贝三食分别有汁煮帆立贝、柚子帆立贝及火炙帆立贝，我只系食咗汁煮及柚子，我比较喜欢柚子帆立贝, 都系果句, 够清新, 都系啱夏季食, 汁煮其实都好食, 味道唔太浓, 无影响帆立贝嘅鲜味, 都值得一食。