影片
更多
2012-07-12
61 浏览
依家算系西九人，东九龙真系好少嚟，饮食足迹晌依头都无乜几多个脚印。今晚有幸获邀出席是次以「夏至．清新粤菜经典」为题嘅试食会，多谢邀请方及德艺会，等小弟可品尝多道清新新派粤菜。「德艺会」，名字比较陌生，原来系港铁上盖嘅私人休闲会所，初到门口，真系睇唔出里面有间咁大、装修咁瑰丽高雅嘅中菜馆。整个大堂一睇就知以摆婚宴做卖点，25呎超高楼底，无柱宴会厅、巨型水晶灯，童话式南瓜车，高架小舞台，回旋云石长梯，都算气派不凡，绝对系摆婚宴佳点。不过，唔知晚饭价位如何，因为整晚所见，头尾都系两枱散客，感觉显得颇为冷清，再者，德福选择多的是，生客更加唔会识入嚟帮（虽然无入会都可以嚟叹茶、食饭）。除咗环境好之外，服务亦都值得一赞，服务员细意殷勤，时刻保持笑容。整晚每道菜都先俾我哋影影相（可能已经成为香港食肆嘅奇景，𩠌菜一上枱啲客企晒起身猛影相，哈哈），之后再为我哋分好后才再送上。但系，不知何解，今晚系以龟速上菜，每道菜都相隔近乎十多廿分钟，虽然唔系急住走，但令人食得有种「断橛禾虫」嘅感觉，唔够一气呵成咁啰！所以，后尾大厨李师傅问大家系咪好赶时间，真系有啲搭唔上咀，做惯酒席菜应该乒乒澎澎架嘛，真系费解呀！环境
「德艺会」，名字比较陌生，原来系港铁上盖嘅私人休闲会所，初到门口，真系睇唔出里面有间咁大、装修咁瑰丽高雅嘅中菜馆。整个大堂一睇就知以摆婚宴做卖点，25呎超高楼底，无柱宴会厅、巨型水晶灯，童话式南瓜车，高架小舞台，回旋云石长梯，都算气派不凡，绝对系摆婚宴佳点。不过，唔知晚饭价位如何，因为整晚所见，头尾都系两枱散客，感觉显得颇为冷清，再者，德福选择多的是，生客更加唔会识入嚟帮（虽然无入会都可以嚟叹茶、食饭）。
除咗环境好之外，服务亦都值得一赞，服务员细意殷勤，时刻保持笑容。整晚每道菜都先俾我哋影影相（可能已经成为香港食肆嘅奇景，𩠌菜一上枱啲客企晒起身猛影相，哈哈），之后再为我哋分好后才再送上。但系，不知何解，今晚系以龟速上菜，每道菜都相隔近乎十多廿分钟，虽然唔系急住走，但令人食得有种「断橛禾虫」嘅感觉，唔够一气呵成咁啰！所以，后尾大厨李师傅问大家系咪好赶时间，真系有啲搭唔上咀，做惯酒席菜应该乒乒澎澎架嘛，真系费解呀！环境同服务讲过，轮都轮到讲饮饮食食。德艺会传统或创意粤菜都有做，今晚大厨都系想晌夏天以清新为出发点，精心炮制咗8道菜，食材都系酒席常见用料，如海参、花胶、鲍鱼、鱼翅、石斑……等等，但就想用较新派手法去演绎。结果系点？下面继续睇片……
香芒沙律船
如果讲食材，依道沙律故然系普通咗啲，生果沙律铺上两块芒果，旁边再跟埋火龙果同蟹籽。不过，讲卖相又几有趣，个沙律加咗粒士多啤梨同两粒蓝莓，变咗好似眼同鼻咁，成只反肚虫虫咁，蟹籽就变咗佢啲卵。作为头盘，清新有余，香甜不足，因为芒果未熟透，我所食嘅两片都系酸嘅，而火龙果一向都系好睇唔好食，因为火龙果嘅甜味好快散，只有晌产地即食先食到上佳嘅货色。不过，大厨后来都有解释，点解将蟹籽分开摆，原来为咗方便一啲唔钟意食蟹籽嘅人，果然细心呀！
烧汁海参条卖相好家常，但香与味就一流，一上枱真系香气四溢，个个食家闻到都话好香。以烧汁爆炒海参条、莲藕条、蜜糖豆、茄瓜条，再配埋黄椒、红椒，撤把芝麻。因为个烧汁调得好，非常惹味，尤其用晌海参依类本身无乜味嘅食材。而加咗莲藕条、蜜糖豆、黄椒、红椒，令口感多添几分爽脆，系今晚其中一款我几钟意嘅菜式。不过，海参条同茄瓜条外观好相似，服务员分𩠌时都难以辨认，所以有食家大叹无乜海参嘅！
消暑佛跳墙系今晚一大亮点，因为据介绍：「保留传统佛跳墙嘅矜贵食材，加入清润嘅竹蔗、茅根、马蹄，炖足4.5小时，令鱼翅、海参、花胶、响螺嘅精华完全溶入汤中，味道清甜，是夏日消暑佳品。」，你话系咪好令人期待呢？一大窝送到众人眼前，先验明正身，真系睇得出用料十足，丰富得很，无论海参、花胶、响螺，都切得大大件，一啲都无手紧，反而鱼翅比较细且少，其实无仲好啦，因为睇过啲猎鲨取翅嘅纪录片都觉得几残忍，所以，依家自己都唔会主动叫鱼翅食。服务员随后还放上剩余汤渣，正当我哋一众疑惑唔通花胶、海参……仲未分晒？原来系其他汤料，包括老鸡、冬菇、瘦肉……等等，怪不之得汤头清润之余，又咁够味啦，不愧是晚亮点！查实连汤渣嘅冬菇同鸡肉都唔错，尤其前者，好有肉地。唯一要挑剔系「分赃」唔匀，有啲食家分多啲，有啲就分少咗，可能无咗鱼翅，可能无咗响螺咁啰，哈哈！
嫣红脆石斑以原条石斑起骨脆炸，伴以士多啤梨酱同食，不过上枱个「版本」卖相嫣红换来有啲「血腥感」，而且士多啤梨酱只系底下嫣红一抹，原来晌分碟再上之后，每客石斑跟一小杯士多啤梨酱先系真身，位上卖相顺眼好多。事后亦都向太厨查问过，佢话平时散叫都系逐位上，好少一大碟咁上枱。讲番道菜个味道，石班肉颇鲜嫩，脆浆口感比平时食到嘅轻盈啲，伴酸甜开胃嘅士多啤梨酱，几啱夏天食，但系有食家话似果酱，搽面包都得，但小弟觉得又未至于去到果酱咁杰身，不过就偏甜。平时斑块配沙律酱就食得多，今次配上士多啤梨酱，又几有特色。
西红柿焗原只鲍鱼原个大蕃茄，掏空再配上鲜鲍，酿满牛油果、洋葱粒、西芹粒，加点点芝士轻焗，伴以露笋仔，红红绿绿，卖相几赏心悦目。大厨提到蕃茄系澳洲有机货，而鲍鱼系澳洲种嘅原只鲜鲍（唔一定系来自澳洲），而调配嘅酱汁加咗白酒。食落，细细只嘅鲜鲍鱼仔未至好韧，但唔系食溏心𠮶种口感，更唔会有咩啜刀效果，系一种爽而烟韧嘅感觉，但伴已混有芝士、牛油果、洋葱粒嘅酱汁同食，味道系唔错。以一道热盘而言，蕃茄比较生，再焗软少少更啱我口味。
冬林百籽虾讲卖相，真系几有种透心凉嘅感觉，只虾好似瞓晌张浮床度咁，可惜佢被人蒸熟咗。清鸡汤煨煮过嘅冬瓜，甚为腍身，而且几入味，加几粒夜香花点缀一下个清汤；而海中虾「屈」成凤尾，加上蟹籽作装饰，几鲜明突出，虾肉蒸得几爽口，只系虾只偏细，变得肉少，虾头瘀黑，外观要扣分！后来跟大厨倾开，以为依个系新派菜，原来唔系，佢话系古老嘢，以前啲人兴将啲海中虾排成扇形，仲话道菜有百子千孙嘅喻意！唔怪得依家无啦，养一个都要成4百万㖞！
西施海皇泡饭个泡饭玩「大厨出马」，由李师傅即席表演，先嚟材料晒冷介绍，跟手起火将砂窝嘅鸡汤煮滚，然后加入白饭、虾仁、带子、小棠菜粒，再滚起之祭，最后倒入以200度高温热油炸熟嘅炸米粒，哗，「咋咋声」几过瘾，一阵香气四喷！分小碗时，加埋啲葱粒、芝麻粒提升香味，而个汤底原来本身已加有冬菇粒、大头菜粒，所以整体嚟讲，个泡饭口感丰富，饭粒饱吸鸡汤精华，虾仁带子味鲜。故此，在座好多食家都评佢为是晚最爱，包括小弟，诚意推介之作。
烧焗椰皇蛋白依款糖水唔算多食，以前都系晌大角咀嘅猪仔记食过，但就好滋味，今晚再重遇，自然可以再回味。椰皇注上以鲜奶、蛋白混和嘅材料浆，原个烧焗，有别出面，就系加多一层酥皮，唔讲以为上错酥皮汤。老实讲，作为结尾甜品，加咗酥皮变得太重身，不过，今晚𩠌菜份量有啲偏少，食咗头6道菜感觉都系半饱，去埋个泡饭，加埋依个酥皮先系啱啱好。我当块酥皮系副产品，所以不多讲。但鲜奶蛋白焗得嫩滑，「sir」一声就滑过喉咙不留痕，奶味浓郁，而且甜度啱啱好。最可惜系无附上小铁匙，未能尽兴刮晒啲椰皇肉嚟食！因为椰皇啲肉本身几软腍，唔难刮，跟鲜奶蛋白焗过会带有少许奶香，几好食架！
今晚部份菜式都几特别，亦见花咗唔少心思，营造酒店级嘅体验，环境同服务都好好；只系有啲菜式跟期望有较大落差，而且份量稍为偏少，仲有系等上菜等得有啲纳闷，否则，会更加尽兴。张贴
