Wooden House (已結業)

今日去开附近嘅中南买嘢，落雨又想食西餐，就入咗呢度啦。入到去个环境都几舒服，静静地唔会太嘈太热闹。<龙虾汤配红虾刺身，$98>个虾刺身原来已经切好左，放得好靓。店员提及可以将刺身放入汤，食落就会暖暖地。个人比较喜欢就咁食，对于暖嘅刺身无乜好感。平时无乜饮开龙虾汤，呢个觉得都唔错。<西班牙伊比利亚黑毛猪配烤红椒坚果酱，$288>黑毛猪略嫌过熟，食落有少少韧，本身期待会比较腍，所以有少少失望。而佢个烤红椒坚果酱唔算好特别，食落唔辣又无乜味。配菜反而做得好好，薯仔轻轻煎过食落好香口而又不腻，蕃茄仔多汁鲜甜。<芒果沙冰，$45>芒果沙冰有别于平时饮开嘅泰式芒果沙冰，好似加少少奶类去做成嘅沙冰，感觉比较杰身，芒果味唔算浓郁，但胜在唔会好甜。<窝夫配意大利雪糕，$58>窝夫比较实，唔系外脆内软改𠮶种感觉，但系个味道都唔错嘅。我哋都觉得个意大利雪糕唔够滑，不过朱古力味够晒浓郁。价钱中规中矩，如果想同另一半去一啲清静环境嘅餐厅庆祝记念日都系一个唔错嘅推介。