Home Sweet Home (已結業)

相信最近大家都好大压力，有时都要约朋友一齐倾吓计，放松下。今日就约咗位好姊妹嚟到太子呢间餐厅食下午茶，呢个价钱以下午茶set来讲都算合理。食下午茶除咗食物重要之外，有冇打卡位都好重要！呢间餐厅本身嘅环境已经好靓，好有格调。到主角下午茶，呢个鸟笼般嘅层架，用咗金色更显气派，食物高高低低咁放，影相出嚟更靓更吸引，打卡一流。食物方面当然都系有咸有甜，咸点方面个人最喜欢呢个三文鱼子温泉蛋。首先卖相已经好吸引，滑嫩嘅温泉蛋上面放上非常新鲜嘅三文鱼子，鲜味十足。另一个我都好欣赏嘅咸点，就系呢个芝士火腿牛角包，听落好似好普通，但其实牛角包要做得好食都唔容易。呢个牛角包够松脆，充满牛油香，但唔会好油腻，加埋大量嘅芝士，邪恶嘅美味。甜品方面都做得好精致，有奶冻，马卡龙，泡芙，冻饼，仲有我嘅最爱焦糖炖蛋。香脆的焦糖糖衣，配上软滑的炖蛋，好令人回味。饮品方面我哋要左杯冻咖啡同冻朱古力，一面饮，一面食，一面倾计，可以暂时忘记烦恼。