又一戟 (已結業)

唔知道大家去日本有冇食可爱饼嘅爱好呢?当然,日本嘅可丽饼净系睇门面已经够抢眼也可爱,大部份都系吸引少女们嘅Kawaii style,之但系我哋香港都唔输蚀,如果要讲到出色嘅可丽饼,就非<又一戟>莫属喇。 对我嚟讲,葵芳呢间分店应该系佢哋嘅发迹地,我好似细细个读书时期(出卖年龄?!)已经开始帮衬佢哋,佢哋舖面一个个栩栩如生嘅班戟样本,无论系咸嘅定系甜嘅都应有尽有,多年嚟水准依旧,亦都开始喺其他地区开咗分店。 今日嚟到葵涌广场行街shopping,要填肚当然又心思思嚟帮衬佢哋喇。今次点嘅呢份系吞拿鱼班戟,本身只售$26蚊,我另加芝士所以加多$4蚊就有交易喇。 葵广呢间分店我次次嚟都客人不断,由点单买飞开始轮候,职员所有班戟即叫即整,普遍都需时等大约七至八分钟就可以食得到,虽然卖相冇日本咁精美,但佢嘅美味亦可以同日本一较高下,与其话佢只系一份吞拿鱼班戟,我觉得佢可以叫做"吞拿鱼沙律班戟",啱啱烘好嘅班戟皮唔算十分厚,蛋味好香,里面除咗有吞拿鱼馅料之外仲有加咗生菜同埋沙律酱,味道开胃可口,而我加钱加咗芝士就更加多一份层次,绝对可以同日本可丽饼媲美