拉麵天王 (已結業)

天氣開始轉涼，總係想食啲暖笠笠嘅野😍再次光顧拉麵天王，淨係諗起個湯底就已經興奮。我同朋友一人叫咗一個麵，分別係赤天王同限定嘅胡椒天王，兩款都好暖胃😋湯底同香油嘅濃淡度、要唔要叉燒同蔥、麵嘅軟硬程度都可以自己選擇👍🏻赤天王（$82）辣味好突出，辣得嚟又唔會好嗆喉，亦唔會搶咗豬骨湯嘅味～朋友要咗多香油，感覺會比較油膩，但同時又令到麵質更軟滑！叉燒偏瘦，但口感唔會太削，溏心蛋醬油味唔係好重。個湯底真係好香，朋友飲唔停😂限定胡椒天王（＄92）未食已經聞到好重嘅胡椒味，我叫咗淡香油，所以食落感覺唔會太油膩。除咗好濃嘅黑胡椒之外，仲有芝士，估唔到又幾夾！湯底夠濃郁，飲落去仲覺得好暖胃，食到最後都唔覺得好鹹👍🏻不過我覺得隻幼麵幼咗少少，口感就無咁豐富，不過好彩煮得夠爽口😛最後我地仲叫咗份烤餃子（＄30）餃子個皮烤完有啲厚，同有少少硬。咬開脆卜卜，但要小心熱，啲汁會爆出嚟！我就試咗個芝士年糕（＄12）年糕好煙韌，芝士流出嚟好正😍芝士味唔太鹹，食完咁濃嘅湯底都唔怕"濟"～依家仲有感謝祭，平日下午3-4點有全單半價嘅優惠😭