Sagrantino

营业中

休息中

最近好想食意式千层面，刚好上午喺半山开完会，中午就嚟到苏豪附近揾食。睇过不少间意大利餐厅都冇意式千层面，兜兜转转下嚟到呢间喺威灵顿街上楼嘅意大利餐厅，都冇时间心机睇食评，问侍应有冇意式千层面？话有！我就坐低点咗餐。首先蘑菇汤有小惊喜，不是忌廉蘑菇汤，侍应特别讲解话佢哋餐厅嘅蘑菇汤系唔会加忌廉，我个人喜欢，而且觉得冇用忌廉更加符合意大利菜嘅特色。饮落都好味，不过饮完喉咙有少少干，希望唔系有味精。主角千层面终于嚟，卖相一般，有兴趣可以睇其他食友上传嘅相片。睇得出系高温焗炉刚攞出嚟，上面嘅芝士仲起紧热泡，怕烫伤忍住肚饿用上餐汤时附送嘅面包棒轻轻垂直插入千层面，立即热气爆升，吹几下放到嘴里都有少少被烫伤。不过失望接踵而至，简单来说，就是一层芝士一层肉酱一层面一层肉酱…意大利国家咁大，可能有唔同类型嘅千层面，但系呢间餐厅嘅千层面就不敢恭维…单一品种嘅芝士份量都算几足够，肉酱好普通，千层面系细长方形嘅软淋淋千层面；整体食落有啲似希腊嘅木莎卡，但冇茄子；总结就系似急冻食品或者快餐厅茶记等级嘅千层面，超失望… 个人建议，我觉得千层面可以有多少少acidity 酸味，或者加少少意大利香草都会有所帮助。