素食新一代 (已結業)

同细妹喺医院探完妈咪，大家都未食lunch，决定去呢度食个丰富嘅晚餐。心情系十分悲伤低落嘅！但遇见有礼貌亲切肥哥哥老板，佢友善嘅招待，顿感片刻温暖！我同细妹一人一份套餐，要乜有乜，多粥多饭得，多菜唔要饭又得，因素扒卖哂变咗两条珍宝size鲜竹卷，边食仲边问答我哋够唔够？话有乜需要即管讲！𠮶刻真系感动到有啲想喊！我谂起昏迷中嘅肥妈，如果我能带埋佢一齐嚟食就好，可惜，今生已再冇机会…讲返啲𩠌，我同细妹唔要粥饭系啱嘅，因为净系𩠌已经系四人份量！南瓜大大旧，出奇地软腍又微甜、鸡蛋同豆腐本身系我至爱，两款同样好味，我点咗私伙七包茄汁！茄子亦够腍，炒杂菜就系椰菜同白菜，总之卅八蚊一大份，真系抵到唔知边度揾？细妹要汤我要豆浆，豆腐甜淡适中，如果大杯啲就更好了！总而言之，小店本身已值得支持，食物美味价钱又合理，再加埋亲切友善嘅服务，下次有机会，我会再去嘅！（只系希望下次唔系带住悲伤嘅心情去！大家到我嘅专页或blog就知我悲伤嘅原因！)肥哥哥，俾心机！