串本屋 (已結業)

串本屋，一间食日本串烧嘅餐厅，舖内面积唔算大，日系feel设计，座位宽敞几舒适。首先有前菜系冷盘酱汁蕃茄，非常开胃可以提升食欲！连同汁煮海螺一齐上，非常夹，呢个搞到我有错觉以为呢两个都系前菜添呀夹到都系冷盘，份量够，海螺肉容易食，而且非常开胃醒神！炸物一定唔少得流心炸虾球及吉列炸生蚝，炸得够透，香口脆身。封门柳有盐烧及蒜香两款口味，都有牛肉鲜味，各有特色。我嘅必食推介系烧油甘鱼鲛，烧得香喷喷，够甘香，鱼鲛好多肉，肉质细腻绵密，食得出鲜甜味。不要睇小晚市定食嘅菜式，原来厚烧牛舌饭会一试难忘，因为牛舌非常入味，嫩滑软身，配埋软硬适中嘅珍珠米，同埋甜美嘅酱汁，简直系人间极品。而且跟餐有沙律菜及面豉汤，仲可以加钱配一款小食，好抵。我拣咗焦糖烧菠萝，唔止卖相靓，食落香甜解腻，一流。餐厅价钱亲民，食物水准高，效率快，招呼又亲切有礼，值得推荐。