餃掂手工餃子雲吞專門店 (已結業)

近排天气反反覆覆，搞到都有啲作感冒。所以去左太子𠮶头揾睇开嘅中医师傅执下几剂感冒茶饮下。行经界限街见到饺掂招牌写住「天下第一饺」咁巴闭，就入去会一会佢有几巴闭。柯打左招牌至尊松茸猪肉饺，同埋黑白松露鸳鸯煎饺。跟饺子会有碗状元汤，味道饮汤似花生眉豆鸡脚混合粉葛鲮鱼汤咁，有啲清甜同轻微中药味，味道都唔错。黄金皮蛋。味道几香虽然流心程度唔系好犀利，但配上腌萝卜一齐食就好夹，去除晒皮蛋嘅铁锈味。软软腍腍咁，唔错。黑白松露饺(8只)，黑松露及白松露各占一半。猪肉馅几结实，其实味道同香味就无咩分别，系个内馅颜色上系一黑一白。两款都唔使点酱油／其他调味就够味了。松茸饺味道比黑白松露饺味道为淡，但口感好好多为系会食到一粒粒嘅松茸系入面。味道系淡淡嘅清香，无松露咁浓烈。最啱系点啲辣椒酱黎食。不得不提系呢度嘅自家制腌酸菜萝卜，味道酸得黎唔呛，酸甜度做得几好对于饺子呢类易滞嘅食物黎讲，好消滞同清味蕾。不过啲辣椒就咁食就太劲了食左一块已经够了。虽然系饺子掂，但内笼装修都好企理，又有唔同嘅食材养生资讯，都系几唔错嘅一间饺子店。