旺記冰室 (大本型) (已結業)

中午决定去试下屋企附近新开嘅旺记冰室。听闻佢最出名嘅就系滑蛋饭，而我又几钟意食滑蛋，所以就决定去试吓啦。因为系新开嘅关系，所以都好干净，望落印象感觉几好。而且因为职员都唔少，所以我一入去就即刻有人安排我埋枱，唔使要我等好耐。餐牌选择就唔多，主要都系通粉同埋滑蛋饭。而当日嘅特制饭餐就系忌廉汁猪扒饭。不过因为我都系想食滑蛋饭啦，所以最后都系嗌左滑蛋叉烧虾仁饭同热朱古力。埋单60蚊。杯热朱古力都系正常茶餐厅会有嘅𠮶种，味道冇咩特别。跟住我碟滑蛋叉烧虾仁饭就到咗啦，上菜时间都唔系好长，大概三四分钟度。虽然叉烧有啲薄，但系份量都唔少，块块都好大块，而且有好多块。至于虾仁亦都系大大只，咬落去都叫爽口弹牙。而且饭嘅份量都好多，成座山咁多。但系甜豉油嘅份量就有啲啲啲多。不过滑蛋亦都的确系几滑嘅，唔会炒得太干身。整体来讲，都系一碟几唔错嘅滑蛋叉烧饭。