太平飯店 (已結業)

朋友生日，地胆带路食呢间。系北角做左咁耐野，都唔知有间咁嘅餐厅，朋友话系米芝连阿鸿小吃班底开。小妹以前系阿鸿粉丝，自从阿鸿离开北角就冇好潮州菜食，得返和富对面果间，冇咩得拣。朋友订左位，又订埋濑尿虾同乌头。另外叫埋溏心蛋、鸭舌、卤水双拼、糖醋面同反沙紫薯。 溏心蛋有酒香但冇咩味，个人觉得加少少盐更好味。鸭舌有三只味，送啤酒几好。卤水拼盘叫左鹅片同墨鱼，鹅片超滑！仲有最爱嘅底脾肉，卖相同味道都同阿鸿一样，竟然冇失望㖞！ 挂住食，唔记得影全相乌头有黄油，都好食，但唔特别。同九龙城海老四差唔多，但呢度平啲啰。 濑尿虾用椒盐炒，好惹味！ 虽然细细只虾，但都有膏都多肉，几好！ 特别叫左糖醋面，一上碟大家就哗哗声，因为竟然用木板上碟，又几盏鬼。最后叫埋反沙紫薯做甜品，卖相100分，味道70分啦，因为真系太甜，食一旧就够，但生日朋友竟然成碟食哂，劲！ 请埋朋友食，5个人每人二百蚊都唔洗，超抵啦！