香港仔潮州海鮮酒家

营业中

休息中

位處深水埗長沙灣嘅呢間餐館，單睇個店名以為應該係香港仔😅不過就好似星洲炒米、福建炒飯一樣，個名同個位置無關。講番啲食物，呢間餐館好適合家庭同朋友聚會，食啲夠碟頭鑊氣又食香幾支啤酒。晚餐點咗11碟菜，分別有滷水鵝肝拼盤、椒鹽白飯魚，蠔餅、咕嚕肉、啫啫芥蘭煲、炸蝦棗、蒜蓉開邊蒸蝦、刴椒大魚頭加伊麵底、鮑魚雞煲、糖醋煎麵同反沙芋。最值得推介嘅係滷水鵝肝，好滑，同滷水啲味好夾，併埋爽口鵝腸同豆腐鵝肉好好食。另外，椒鹽白飯魚嘅魚比一般嘅粗身，夠魚味。雞煲好惹味，一上台香辣味撲鼻，蒜蓉中蝦好新鮮，刴辣椒大魚頭加伊麵比較特別，個麵底因為吸收咗個汁好好食，不過唔食得辣嘅話就要小心😅個糖醋煎麵煎得好香口。相對遜色嘅反而係菠蘿咕嚕肉，菠蘿新鮮，不過肉較乾同粉多咗啲，反沙芋鬆化，可惜太粗身。整晚侍應都好忙，有侍應不足嘅感覺，不過態度好好，反正唔係去高級餐廳，氣氛反而緊要啲。