Dazzling Cafe (皇室堡) (已結業)

记得两年前同朋友第一次试呢到嘅窝夫，一试难忘，今日终于食第二次。由于每人都要嗌一杯野饮，我嗌左仲夏热带水果茶，男朋友嗌蔓越莓苹果茶。水果茶系用茶壶装，份量好多，都算有两杯。以往喺餐厅饮水果茶，有唔少都系由香橙/热情果味，覆盖晒其他水果嘅味，但呢个水果茶唔会太酸。饮落系苹果同提子嘅味多啲，清甜！相反，唔推介蔓越莓苹果茶，饮落好似利宾纳，莓嘅味好假，甜得好唔自然。黄金乌鱼子蒜香意大利面，比较重口味。蒜香好易食得出嘅，几惹味但真心咸。另外份量好少，一个人食都未必够。好彩仲嗌左个窝夫，两个人嘅话，嗌$300左右食物已经够饱，因为甜品饱肚，饮埋杯饮品系好饱。窝夫嘅配酱有士多啤梨酱、炼奶同枫糖浆（？），加埋雪糕、忌廉、士多啤梨同朱古力，口感好丰富！炼奶嘅味好突出，好好味。雪糕都算够，令到窝夫唔会好干。重要嘅系窝夫本身都算松软，唔会太重面粉味。总结黎讲几满意，一边食又可以欣赏窗外风景，几写意。