圍威喂 (荃灣廣場) (已結業)

因为疫情关系已经好一段时间冇食泰国菜，最近发现同先生一直想食嘅围威喂原来喺荃湾开咗分店，当然唔能够放过。食物选择多元化，除咗热门嘅东南亚菜色之外，仲有唔少特别嘅配搭，例如喺沙律入面加入腊肠同咖喱配羊架，玩味颇浓。鸡肉串大大串而且够哂厚身，本身已经腌制过再烧到香喷喷，鸡肉非常嫩滑，沾上沙嗲酱更加无懈可击。青木瓜沙律份量非常多，酸甜开胃，加入味道清淡嘅四季豆感觉更清新，原只软壳蟹炸得够哂酥脆，有画龙点睛嘅效果。草菇、秀珍菇同秋葵加入金不换去炒，令本来平平无奇嘅炒杂蔬变得鲜味无比，好有惊喜。马沙文咖喱唔会有强烈嘅香料味道，亦唔会有呛喉嘅辣度，但入口依然非常香浓，系比较温和嘅咖喱，令人不由自主食完一啖又一啖，好可惜已经点咗炒饭，唔系嘅话配上薄饼绝对会系完美组合！牛舌大大片而且系厚切，口感弹牙之余仲保留到香浓嘅牛味，唔会俾同样浓味嘅咖喱盖过。菠萝炒饭份量好大，配料亦非常多，两三个人分享都冇问题。东南亚菜虽然吸引，但平时最怕餐厅唔卫生，呢度环境宽敞而且俾人嘅感觉非常整洁，食物味道亦系一流，相信会成为常客。