霸嗎拉麵 (已搬遷) 新店位置

话说大年初一揾食甚艰难啊，谂住医饱肚去睇花车巡游。心血来潮想食拉面，就去登龙街碰下运气，一于边间开就食边间。去到只有两间正常营业，三田制面已经试过啦，咁就「霸吗拉面」啦。 - 绿茶可乐（$25）原来咁好饮㗎！未试之前可能会觉得只味会怪怪地，试咗就觉得好好饮好特别，绿茶有可乐味，可乐有绿茶味。 - 青梅苏打酒（$18）同喺日本买嘅一样，好饮啊！饮晒成罐慢慢会好似有啲醉咗咁，话晒都系有酒精，不过抖翻阵就无嘢啦。 - 鸡叉烧味玉白汤拉面（$88）「点解只蛋唔咪切开两边嘅？」平时食拉面嘅蛋都有切开，不过哩度就无切嘅，只蛋算OK。试咗啖汤底，ummm，比较稀，唔似豚肉拉面嘅汤底咁浓，饮落有啲似即食面啲汤咁嘅。面拣咗硬度适中，口感唔错。块鸡叉烧好好味，仲几厚身，入口慢慢融化，唔干之余又唔会太淋。个人钟意有葱花，成碗面食落会香啲。 - 炙烧豚肉味玉拉面（$88）汤底劲浓，比较稠，好似成碗都系猪骨嘅精华咁。豚肉好厚身，肥瘦适中，肉质较软，同啲炸蒜碎一齐食，坚好味！虽然今日系年初一，但系「霸吗」真系良心舖黎㗎，竟然唔洗加收㖞～ 俾Like