江南瀨粉 (福榮街) (已結業)

讲起濑粉，大家都应该唔会陌生，成世人点都食过下。坊间好似冇乜餐厅主打濑粉，今次就介绍下尼间打正旗号卖濑粉嘅餐厅。平时嘅粉面店，座位都比较挤逼。尼间餐厅就相反，座位好阔落，坐得舒服。舖面光猛，再配合简约嘅装修，比一般粉面店少一份焗促嘅感觉。食物选择好多，好难拣！唯有拣样最多𩠌嘅大大碗鲜制濑粉，咁就样样都可以试到😂再加左碟唔系间间粉面店有嘅白灼鹅肠同酥炸鸡翼。上菜速度一般，可能系同鲜制濑粉有关？🤔大大碗鲜制濑粉真系大大碗，两个人食都绰绰有余！入面包罗万有，有肥牛、水饺，猪润等等。其中我对猪润、鱼皮饺同猪肉嘅印象比较深刻。鱼皮饺味道鲜美，外皮有咬口，馅料丰富。猪肉用上猪腩肉，餣得入味。猪润厚身，入口滑溜，冇腥味。坊间好味嘅猪润买少见少，喺尼度食到真系幸运！酥炸鸡翼上枱热辣辣！外皮炸得酥脆，内里仲有肉汁，要小心辣咀！白灼鹅肠就有少少令人失望...份量唔算多，当小食就还好嘅。鹅肠够厚身，够爽口，可惜油脂唔够丰富，冇鹅膻味，严格尼讲系淡味得滞。好彩附上嘅葱油好惹味，一齐食就比较好啲。整体尼讲，尼间餐厅系水准之上，可以一试！