龍門小棧 (已結業)

星期六我同朋友去动漫展之前先食个晏，排队入场行完出返嚟分分钟都成八九点🙈。我哋喺阿信屋买完嘢，就顺便帮衬隔离嘅「龙门小栈」。餐厅好似系新开，但已经唔记得咗上手系乜了。小店环境几四正，落地大玻璃窗令到室内光线充足☀️，感觉开扬。同时，呢度冷气充足，都算坐得舒服。另一边厢，店员们态度亲切有礼，抵赞👍。餐厅食物定价唔贵，面食同客饭平均都系六七十蚊以内就有交易。再者，佢亦设有本帮客饭套餐($98)，包前菜、主菜同饮品，我认为套餐更为扺食😃。三宝烤麸，烤麸以面筋作为原食材，再配以黑木耳同少量菇豆🍄，以小食嚟讲份量都几多。我估计调味采用咗斋蚝油，食落带少少甜香；而且面筋好似海绵咁超索汁，好味道。口水雏鸡(+$15)，🐔口水鸡味道好浓郁，口水酱属于小辣，但麻味就好强，整体超惹味。鸡份量唔算多，但有几件鸡胸肉，所以都OK，而且鸡肉并唔系雪到无哩味道𠮶种。香酥猪排，🥩猪排大大件兼系厚切，并可选原块上或切件，原来底部仲垫有葱同芽菜。猪排外层炸得酥脆，肉质软嫩，绝非用松肉粉腌制就可做到嘅效果。猪排表面蘸咗啲味粉，所以好够味。上海回锅肉，🐷回锅肉同样大大碟，入面有猪腩片、鱼糕、椰菜同灯笼椒等，肉同菜嘅比例适中。