Milu Thai มิลู่ไทย (亞士厘道)

营业中

休息中

好食又都算抵食嘅泰菜！嚟到必食嘅应该系招牌菜「火山排骨」，见到差唔多枱枱都点。其实呢个系曼谷拉差达火车夜市嘅招牌地道美食，一片片啖啖肉嘅排骨堆叠成巨型火山咁，唔只好食，打卡亦一流，所以爆红！不过喺香港就唔系间间泰国菜都有，就算有亦未必间间好食。Milu Thai呢度嘅火山排骨系我食过最好食之一，肉质炆到软淋淋够晒嫩弹，手撕就得，淋上酸酸辣辣嘅青辣椒蒜头酱汁，完全做出曼谷夜市嘅风味精髓，香辣美味，可选择辣度，大大份啖啖肉都只系$228，人多share最好。再逐个𩠌讲吓... 泰式烧鱿鱼：火候控制得好好，烧出鱿鱼浓郁焦香又唔会韧，仲好厚肉。盐烧鲗鱼：鱼肉鲜嫩，外皮香脆，阿仔自己都食咗半条，不过等佢大个识得食辣，点埋个泰式酸辣汁就会再领略到更高层次嘅美味喇😏蒜蓉通菜：建议大家必点，能够将一个蒜蓉通菜炒到咁香咁fresh咁好食，真系唔系度度可以食到。见到呢度有露天区域，不过而家太热，迟啲天气凉啲，坐出去应该几正。