千賀水產の鮮鍋道場 (已結業)

过2日就冬至啦，梗系要食丰富D啦！今日我地成班同事就拣咗嚟呢间千贺水产食lunch。本来以为佢只系semi buffet，以为净系D菜、丸类、甜品、饮品系任攞，点知原来出面个任食任饮区，直程就已经系一个非常完整嘅buffet，包罗万有。净系熟食就已经有廿几卅款，炒饭、面、蒸鱼、霸王鸡、酱油鸭、青口、炸馒头、烧卖、蛋糕、沙律、雪糕、生果、饮品……乜都有齐，仲要分晒区，中式区、欧洲区、日式区等等等等，非常多选择。由于我地嘅午膳时间不多，所以选择咗可以食2个钟嘅"任食火锅肉之放题环球美食"。呢个餐除咗可以任食出面嘅所有熟食、甜品、生果和饮品之外，火锅肉(包括猪、牛、羊、鸡)都系任叫任食。另外，值得一赞嘅系，每次我地落完order之后(火锅肉)都好快就送到，完全配合到我地嘅进度。总括来说，"千贺水产"呢度嘅食物款式多，上菜快，质数绝不会因此而渣流摊。唯恨我地无拣到4小时𠮶个餐，所以无得烚海鲜和饺子。但见到隔离枱烚海鲜食得津津有味，一众同事们已经约定下次一定要再嚟烚过。