拾悦咖啡 (已結業)

难得的一日返晏，其实好应该训够皮差下电，可惜年纪大训唔到咁多，所以弹咗起身揾个brunch食吓。小巴落到火炭因天气太热唔想行入去啲工厂区就入咗去沙田商业中心。见到有间叫拾悦咖啡有靠落地玻璃窗嘅枱比我望吓就入咗去。初头都谂住叫吓all day breakfast，不过见佢有冷面set又想试吓所以叫咗个柠檬汁烟三文鱼天使冷面配美式咖啡。望住落地玻璃窗（虽然并唔系咩无敌靓景），背景音乐一直播紧我最爱听嘅薛子谦 (简单点说话的方式简单点，递进的情绪请省略，你又不是个演员，别设计那些情节 ) 个人完全尽入放空状态，好舒服好relax。过咗一阵啲野食嚟喇，见到个冷面都好靓好有食欲。我先唧咗啲柠檬汁落去然后食第一啖，感觉好清新，好适合夏天食呀，冷面口感一流，有韧道得嚟又唔会淋系带少少硬身𠮶种再配合柠檬汁同底下嘅沙律菜，又好味又无罪恶感。我点嘅美式咖啡属于较浓，啱哂我今晚又要开夜。我继续放空咁慢慢食完叹埋个咖啡之后电话声响起我要返工嘅讯号喇，起身走嘅时候十分精神，仿佛已经训咗好耐咁，有时个人差电未必一定系训觉嘅，可以好优闲咁放空食一啲美味嘅食物都可以系为自己差差电嘅方法呢～