麵留香

营业中

休息中

依段花园街，揾食话咁易，因为短短50米左右一截嘅街仔，数埋十几间食店，平贵、中西日、面店、茶餐厅乜都有，实在多选择，最后拣上面留香都系为咗食佢嘅鱼片头。粉面套餐，款款$24，任拣一款粉面，配油菜或茶啡，我哋一行三个人坐低都唔使睇餐牌喇，三个都要鱼片头，系谂吓食粉定食面啫！再加多个炸鱼皮同腐乳通菜。小弟拣食鱼片头河，我谂唔使讲乜嘢系鱼片头，依家应该好多人都知系乜嘢。一碗有4粒鱼片头，大大粒，鱼肉打得爽弹且鱼味浓，不过望落仲系比较白净，咬落就认为佢炸得未够金香，食鱼片头都系想食佢层外皮，所以依次未能尽兴。而河粉属幼身类，食落好滑溜。汤底唔算好浓味，但呷起哩清甜唔错，问阿姐，佢话汤底用猪骨同鱼哩熬！几钟意个茶杯，印咗捷荣个唛头，平时间常都有冲捷荣啲三合一咖啡，但今趟杯奶茶，好香茶味，可惜唔算好滑！炸鱼皮，一碟都有几多，载到满，我就钟意就咁食，咬落「咯咯脆」，新鲜嘅表现，否则摆咗成日仲唔过晒气腍晒咩，而且又无「油膉」味；有啲人就会浸落啲清汤度，话怕热气浸一浸清汤心理上好过啲，但就无晒炸嘢𠮶种脆口感。老实讲，个人觉得炸鱼皮其实无乜味道，但又真系几钟意食。