花園餐廳 (西洋菜南街)

营业中

休息中

已经有好多年冇嚟花园餐厅食lunch，好怀念佢哋嘅啫啫铁板牛，下昼一点半嚟到都唔须要等位，不过餐厅都坐满好多人。同朋友叫咗两个午餐，与以往唔同，依家个午餐已经唔见咗个牛油餐包，比块饼干代替算数，以前见好多食客都冇食个餐包，真系好浪费，家下用饼干代替属于悭皮又环保。罗宋汤味够浓郁，但系肉味略为淡薄，亦唔多见到有牛肉喺汤里面，不过比好多餐厅好味。芝士焗肉酱意粉无芝士嘅香味，而肉酱意粉味道好淡，差啲唔知道自己原来食紧肉酱意粉，水准同微波炉雪藏意粉相似，焗猪扒饭就好有问题，啲饭似有轻微炒过，猪扒睇落吸引，但食落有怪味，可能系肉质变坏，我都试咗一小啖，连我都食唔落，所以我朋友只食咗啲饭，而猪扒就成碟放低，话俾个侍应知啲猪扒有怪味，佢成碟攞返入厨房，之后餐厅一啲反应都冇，亦冇任何sorry嘅表示，今时今日咁样做食肆都得㗎咩？感觉非常失望。至于柠檬茶就重柠檬味，颜色靓可惜茶味淡薄。餐厅设于地牢，空气及卫生通常都比较差，花园餐厅属于旧式食肆，而且位处旺角旧区，所以清洁卫生整体算勉勉强强，洗手间就比较差啲，使用时就要忍受一下。