御品千の味刺身壽司專門店 (美居中心)

营业中

休息中

好钟意食甜虾，之前睇新假期知道有88蚊甜虾放题先一直记得呢间野，虽然知道一早无左88放题优惠，但而家有一蚊一只甜虾。睇哂餐牌餐纸，决定叫左个二人餐。三文鱼、甜虾、油甘鱼刺身正常，油甘鱼麻麻地，整体尚算新鲜，但我更喜爱食细细只既甜虾，觉得会比呢种鲜甜一点。烧汁牛肉饭饭好硬，面上既牛肉同洋葱煮到好难食，牛肉太过熟，好似食紧布渣甘，真系好唔掂，成餐饭最难食。食食下仲要食到有块胶系到，无奈。三文鱼冷面三文鱼切到一粒粒易入口，感觉份量都几多下，可惜酱太多，偏咸。软壳蟹天妇罗我系好钟意食软壳蟹既人黎，但呢个系我食过最难食，食到中间真系好咸，食到脚既时候成口油，味道口感完全唔合格。吉列炸蚝炸得好好，表皮热辣辣得黎够松化，可惜蚝唔新鲜，完全无蚝味，其中一旧咬开直头渗水出黎。如果唔系因为有点沙律酱，就等于完全无味既一旧野。饮品选择少，唔想饮汽水，所以拣咗菊花茶、柠檬茶。女侍应应该新请返黎，基本问题都唔识答，覆单错，问可唔可以收信用卡答应该可以转头又话只收现金，问转乌龙茶要加几钱唔知。唔想浪费食物，净系想快快食完快d走，真系绝无下次。