泰贊- 創意泰餐廳 (已結業)

疫情下无晚市堂食，唔想日日自煮，见到外卖自取六折就试吓。虽然门外有好几位等紧，点左三个饭、意粉，十五分钟就有都算几快。点左冬阴公海鲜意粉、椰汁大虾海鲜炒饭、芒果蛋白露笋软壳蟹炒饭。市道唔好，特价外卖好多份量材料都调整过，麦记个包都缩左水。一打开个盒，卖相香味份量都有惊喜，食落仲好得。冬阴公海鲜意粉睇样就知唔够辣，不过都够香茅柠檬叶冬阴公味。青口大只好味又多，意粉炒得干身唔多油，整体不错。椰汁大虾海鲜炒饭，一打开好香椰汁味，唔只一只虾，系炒饭入面有好多中虾粒，五毫子咁大粒蚬肉。粒粒炒饭都充满椰香，啖啖都好足料。折左$63咋，真系卖大包。芒果蛋白露笋软壳蟹炒饭，呢个炒饭本身几好味，只系唔适合外卖。腰果同软壳蟹都淋左，唔计脆唔脆，软壳蟹都好肉几好味。芒果香甜，露笋多到老公问系咪唔使钱？有生果多菜，个饭好fresh 咁。$63一个外卖饭盒嘅卖相都依旧讲究，用的器皿也分炒饭用纸盒减少倒汗水，有汁用胶盒。色香味分量十足，简直超值。