鮨千月 (已結業)

佛诞前夕黎到天后鮨千月叹返个午市厨师发办。呢间位于26楼，居高临下，望到海景添架，亦都有日本风情。我叫左午市餐牌既森罗，厨师会问你有咩唔食。首先系沙律，沙律菜好爽脆而且新鲜，个汁酸酸地好开胃。跟住系茶碗蒸，蒸蛋十分滑，亦都有好多料，好食。左至右: 薄切间白鱼、吞拿鱼刺身、油甘鱼刺身、带子刺身。薄切间白鱼第一次食，要蘸柚子酸汁食，用左花瓣配衬，好精致。刺身全部都好厚切肥美，尤其系带子刺身超级美味，劲鲜甜。接下来系寿司。立鱼寿司配紫苏叶，你食完一件先会上第二件俾你。甜虾寿司配鱼子酱，好新鲜。烧左口鱼边寿司用火枪烧过后，油脂感出晒黎，好正。北海道海胆寿司又系超级鲜甜，好似系日本食到甘。黎到刺身饭，角切刺身堆到好高，刺身绝对多过饭，好味。味噌汤出晒烟，唔会好咸，唔错。最后食埋黑芝麻雪糕，好香浓幼滑，唔系细细球架，十分满足。