Mee...lemongrass (已結業)

自从搬咗去石门，除咗附近京瑞成日去之外，马鞍山都系会经常去行街食饭，今晚一家三口又去新港城行吓，睇吓有冇咩年货要办，行吓行吓行到五期呢边，呢边地方细D，但都有间实惠行吓，行咗一阵太座话要食饭，隔离就有呢间东南亚菜嘅餐厅，一于入去试吓；mee喇沙，里面有虾、鱿鱼、鸡蛋、蚬、蟹柳、鱼蛋同豆卜，配上传统用嘅油面和米粉两沟，汤底又冇过浓抢味道，正呀!太座话好耐冇食酸辣凤爪，我点咗无骨酸辣凤爪沙律，好食到唔停到口，好醒胃；马拉盏炒芥兰，味道适中，唔似其他地方有过咸嘅情况；红豆伯爵奶茶冇叫少甜都唔太甜，茶够滑，几好，太座要嘅系黑糖鲜奶，里面有仙草，佢话超好味，可惜热饮我唔太好；我见到餐牌有马拉一品牛柳粒，无骨海南鸡都好吸引我，下次再嚟试吓先!