囍滿庭海鮮酒家 (已結業)

系红磡区我最喜爱既酒楼，无敌大海景，多款食品选择，出品质量稳定，仲有好多特别菜式，唯独服务要加把劲改善喇，包括厨房都系 ~ 因为公司系附近，工作原因，所以多数都只会系度食午饭，早茶或晚饭机会微啲 ~ 因午市实在非常多人，最好订定枱喇 ﹗但稻香开左之后，已抢左部份食客，但依然经常爆场 ﹗脆皮烧腩仔，差不多每次都叫既小食，皮脆、肉香、肥瘦平均，good ﹗点啲芥辣更能提升咸香 ﹗四川口水鸡，好香、微辣，鸡肉都嫩滑，几好 ﹗但只用鸡仔做，无咩肉食，主要都系过吓口瘾。本人嗜辣，老实讲我完全感觉唔到，只有啲花生香、辣椒香。白烚白菜苗，好普通既一味，无咩特别，清清地，点豉油食，菜嫩口。炸明虾角，好香口，虾弹牙、味鲜，配沙律酱酸酸甜甜，好开胃 ﹗水晶虾饺，皮薄馅靓，大大只虾仁、爽口弹牙，少量肥猪肉带出香味，无肥腻或散筲筲口感，非常好。灌汤小笼包，好功夫，猪肉汁丰盈，饱内满载汤汁，放系醋上面，令小笼饱稍为降温，就成只啪入口，饱皮、肉汁、猪肉混在一起，好有层次，劲好味，如跟上海老店比较已做到超水准 ﹗