LAB10 (裝修中)

平时好少可嚟到旺角朗豪坊楼上食野，咁啱经过见到间平平地嘅韩烧，而且装修好似几得意咁，有啲似自修室咁，每个位之间都隔住块板，一于就入去试下啦😊！虽然呢度系食韩烧，但餐牌上写住无烟韩烧，同埋个炉同平时食𠮶啲韩烧有啲唔同，所以烧起上嚟都唔会话好大味，我都唔需要担心件褛吸晒啲味啦😅！呢度有得比你拣任食或者散叫，如果任食就$248 一位，最后我同朋友都拣咗散嗌。叫咗个牛牛板🐮，好得意呀，同个名一样，真系用一块牛牛板去装住唔同部位嘅牛，有韩式牛肋条、厚切牛舌、安格斯西冷、特级牛后腹、黑牛牛板腱、特级牛小排、严选一口牛，总共有7款，啱晒2个人食。啲牛好有韩牛嘅味道，尤其特级牛后腹，牛味浓郁，肉质嫩滑，太好味啦😋😋！济州三色猪五花🐽，个人比较钟意食韩国嘅五花肉，呢度嘅五花肉唔会太过肥，烧起上嚟好香，脂肪比例恰到好处。点埋特制生姜苹果酱🍎、生姜菠萝酱🍍同青柠酱，味道酸酸哋，另有一番风味。韩式牛肉炒粉丝炒得好香，啲粉丝条条分明，唔会嗱埋一堆，加埋韩式牛肉一齐食，非常好味！🤤饮品方面我哋拣咗个Captain Lab & Red Hot，佢用咗实验室嘅容器去装住啲饮品，完全match番晒餐厅个名Lab 10。