意粉廚房

营业中

休息中

年纪大，食唔到咁多，近年越来越钟意食半自助餐，一个main dish，加餐汤甜品，足以满足食欲之外，价钱百零两百亦相当合理，美中不足系好多半自助餐都无杯餐饮，令我呢类「茶餐厅鬼」最后又要额外买杯嘢饮。今日去咗尖沙咀一间酒店内嘅「意粉厨房」，见佢餐牌都有唔少选择，有牛’有鱼’有海鲜，即使卖相未必算达到酒店水平，但系价钱亦唔系酒店级数，相当合理；最估唔到系餐汤同餐饮任饮，仲得了嘅？事关我系「茶餐厅鬼」之余，亦都似「餐汤怪」，有时拣餐厅食，就系为咗个汤，呢间嘢个汤达到酒店级数，令到我今日饮咗3碗，之后餐饮亦添咗一次，个人觉得，只要唔系特别想食甜品，呢度系十分理想嘅「半自助餐」，而且价钱系$100都唔使，性价比绝对无懈可击。其实，个主菜都值得讲一下，我叫咗个最稳阵嘅三文鱼忌廉汁意粉, 口味相当好，忌廉汁都算清新，三文鱼就正正常常，以咁嘅价钱，仲要系尖沙咀；如果计埋无限添「饮」，真系无得输。