樂心冰室

营业中

休息中

今日7月23号系四姨妈生日，原本我们一早约好咗去食晚饭，但因一个挂咗好短时间嘅台风就取消咗！喺下午𠮶阵知道有个亲友因身体不适入咗院做手术，所以喺夜晚𠮶阵我们就去咗铜锣湾嘅圣保禄医院探望佢，之后我们就同其他亲友一齐去咗渣甸坊嘅「乐心冰室」食晚饭！我们叫咗鱼汤手打墨鱼丸米线嘅墨鱼丸都几爽口弹牙，但墨鱼嘅味道就唔系好浓郁，而米线嘅面质就比较腍身，唔系好烟韧！公司汤通粉嘅材料有火腿、牛肉、叉烧同煎蛋，牛肉嘅肉质都几松软，但肉味就唔系好浓郁，叉烧嘅肉质就比较硬实，而通粉嘅质感好烟韧弹牙！至尊三宝汤通粉嘅三宝系鱼腐、手打牛丸同手打墨鱼丸，鱼腐嘅质感一咬落就觉得好似食紧一「嚿」「发水面包」咁，极之谂身，而且味道系淡而无味，而手打牛丸就好爽口弹牙，而牛肉味都算鲜味，唔会有好「骚」嘅味道！蕃茄牛肉浓汤意粉由于有好多新鲜蕃茄粒舖满表面，所以卖相好色彩缤纷，牛肉嘅肉质亦好松软同份量都几多，而意粉嘅粉质都几烟烟韧韧！跟餐有火腿煎蛋或火腿炒蛋，我们分别都有叫，煎蛋可以做到我们要求嘅太阳蛋效果，炒蛋炒得好滑溜，唔会炒到过熟！多士烘得都几香脆，而且都几大件厚身！