千口甘甜品屋 (已結業)

个人认为，依间系同区做得最出色嘅甜品店，与其去帮衬乜嘢明星店，不如嚟试下依间唔太起眼嘅小铺。佢哋无论喺定订价、服务、食品选择同味道都比附近𠮶几间好，所以奉劝大家唔好再迷信啲乜嘢食家膳稿同明星效应。夏天食品我会推介雪花冰，除咗味道选择多之外，仲可以配好多嘢，例如魔豆、椰果、生果等等。如果你叫士多啤利味，卖相会好似一碟打边炉肥牛；朱古力味则好似熟咗嘅肥牛；加埋好似西生菜嘅蜜瓜味睇落会好有趣。佢哋仲有唔少得意嘅食品，例如可乐啫喱食入口会有气泡嘅感觉，朱古力汤圆就用麦精做汤底。不过有啲食品啲名改得太天花龙凤，要问店员先知系乜嘢。服务方面店员异常热心积极，同一般甜品铺有好大对比，感觉似系做街坊生意。店名系将「甜」字拆开，都显出老板嘅心思。而且佢哋会勇于试较多新款式，食客可以有更多选择，当然价格相宜亦好紧要。佢哋唯一较弱嘅系环境，由于铺面细，好多时都要坐出街边，但邻近街市难免会影响观感。